Act 6 | APZ | STEP | Osohonta a'amu Jisasɨmo inɨngkamotofoso we'e pi'nɨngo imo'nɨmentohofo'maho. A'amu fehohnjo Ngkɨlik hungkuno'njofoho. A'amu fehohnjo Hipɨlu hungkuno'njofoho. A'amu Ngkɨlik hungkuno'njoso a'amu Hipɨlu somo yoka ulɨmentohofi, Sekwo wosopayo, hamniyoho, yo'mayoso a'amu umofonyo iyo somo uyahonɨngkofi nakwoe apɨwojo sofa we'e'nohino mawo'nɨngkohofofoho. Hipɨlu apɨwojo sofa engo mawo'nɨngkohofofoho. Ose ulɨmentohofofoho.

Acts 6

A'amu aho fehohnta'ni hopi'nono fehohnta'ni hufa'uyo sohwamo ‘apousel’ sohwamne'no ufo'mayo'ne uhwosopo'mentohofofoho.

1 Osohonta a'amu Jisasɨmo inɨngkamotofoso we'e pi'nɨngo imo'nɨmentohofo'maho. A'amu fehohnjo Ngkɨlik hungkuno'njofoho. A'amu fehohnjo Hipɨlu hungkuno'njofoho. A'amu Ngkɨlik hungkuno'njoso a'amu Hipɨlu somo yoka ulɨmentohofi, Sekwo wosopayo, hamniyoho, yo'mayoso a'amu umofonyo iyo somo uyahonɨngkofi nakwoe apɨwojo sofa we'e'nohino mawo'nɨngkohofofoho. Hipɨlu apɨwojo sofa engo mawo'nɨngkohofofoho. Ose ulɨmentohofofoho. 2 Oso hungkunoso ho'nɨngkahonɨngki a'amuapousel sɨfe mta'ni hufa'uyo sohwa a'amu hopi'nono Jisasɨmo inomokommotofo somne'no joho ulahonɨngkofi nuhu'mokontɨfi ulɨmentohofi, Nakwo syoho hufa'u'njo sohwona'ni wopɨngo'maho. Nakwo wosopayo'nji hamniyoho'nji yano mpo'nososo Anɨtuye hungkuno pipi losetɨhwanehwono. 3 O'o, nakwoe a'amu soku, sekwo a'amu aho fehohnjo hopi'nono nom'ne aho mta'ango hufa'u sohwamo uhwosopopmno. Syoho yano mpo'none so'nefoho. A'amu huhwo sohwa Anɨtuye Towahuno Wopɨngo engo yamo'nnyo hwafoho. A'amu huno'njo sohwa a'amu hopi'nonohino sohwamo hwe wopɨngo'nohino hwafoho lɨwo'nɨngkohofofoho. Uhwosopopijoso hofɨko wopayo yo'mayoso yano mpe syohoso womokosyohumantɨfeho. 4 Ose yontanɨngkujoso nakwo Anɨtumo isamoyoka ulɨwo'nɨngkuhwasi a'amu somo Anɨtuye hungkuno wolutɨhwantanoho.

5 Ose ulahonɨngkofi, E, wopɨngofoho lontɨfi Sɨtifenɨmo uhwosopo'mentohofofoho. Sɨtifen huhwo sohwo Anɨtumo sɨmeho hi'ntnnono yokumpohn'nyo uyɨwo'nɨmojo hweho. Anɨtuye Towahuno Wopɨngo engo yamo'nnyo hweho. Nom'ne a'amu sohwamo uhwosopo'mentohofoso ole, Filipɨja, Pɨloukoulasɨja, Nikanouja, Timounja, Pamenasɨja, Nikoulasɨjanjoho. Nikoulas huhwo sohwo ango kengo Antiyouknta'ango a'amu Jutafe yahino ma'mentiso hweho. 6 Oso a'amu sohwamo uhwosopentɨfiapousel sohwamo utɨhwamentohofofoho.apousel sohwa a'amu huhwo sohwafe mnokinopo aho kisasyontɨfi hofɨkine'no Anɨtumo jomo ulɨmentohofofoho.

7 Oseso Anɨtuye hungkuno Jelusalem ango ayo'mo ho'nɨmentisofoho. A'amu Jelusalem humamentohofo Jisasɨmo inomokommotofoso pi'nɨngo engo imo'nɨmentohofofoho. A'amu tajo ango syoho'njo fehohnjo sohwa Anɨtuye honɨngkano songo tɨpemantɨfi Jisasɨmo inɨngkamentohofofoho.

A'amu Juta fehohnjoso Sɨtifenɨmne'no hwasyo ulɨmentohofofoho.

8 Anɨtu Sɨtifenɨmo yo'mayo wopɨngoso ulohofahonɨngki Sɨtifen kakoe yokumpohn'nyo engo imo'nonto yo'mayo wonyoangkafoso imentisoso a'amu uhwonɨmentohofoso ole lɨmentohofi, Anɨtu oloso yalofoho. Ose lɨmentohofofoho. 9 I oso'no a'amu nom'nehwa nolɨkafontɨfi Sɨtifen'nji Anɨtuye hungkuno so'no yoka hnnɨmentohofofoho. Oso a'amu sohwa hohonta siki syoho hamniyoho momaso'njo imotofo sohwa olohonta siki humalofo. Hofɨko afapo humawo'nɨngkohofo sopo ole lɨmentohofi, Ango sikinjohwa humayo'nefoho. Oso ango homo somo a'amu Juta Anɨtumne'no isamoyoka angofoho. Oso a'amu sohwa ango Sailini'nji Alekɨsantɨliya'nji oso ango soponta'ango hwafoho. Hofɨko'nji nom'ne a'amu Juta Silisiya hwaho Esiyanta'ango sohwa Sɨtifenɨmo yoka ulɨmentohofofoho. 10 Anɨtuye Towahuno wopɨngoso Sɨtifenɨmo huno wopɨngo uyahonɨngki a'amu nom'ne sohwafe hungkuno somo Sɨtifen kakoe hungkuno uyakolo'mentisofoho. 11 Oso'no a'amu sohwa sɨmano hintotohino umnɨngkahonɨngki a'amu sohwamo hwasyo jo'ne hamniyoho uyahonɨngkofi ole ulɨmentohofi, Olo hwe Sɨtifen sohwo kako Mousesɨmne'no sitofo lɨmaso hweho. Ou, kako Anɨtu ntnne'no sitofo lɨmasofoho. Hwasyo ose ulɨmentohofofoho. 12 Oso hwasyoso ho'nɨngkahonɨngki nehopeho lontɨfi a'amu so'nji hwe engo sohwanji hwe honɨngkano hungkuno lutɨhwamotofo sohwanji sɨmeho wonyo umo'nɨngkahonɨngki Sɨtifenɨmo u'mantɨfi aho kentɨfikaunɨsol uhu'mokumotofo sopo ipemotasɨmentohofofoho. 13 Osopo a'amu hwasyo ulɨfitnne sohwa mɨhumatɨ'mentohofofoho. Ole ulɨmentohofi, Olo hwe lohwo Anɨtuye ango engo so'no wonyo hungkuno ulɨmasofoho. Mousesɨye honɨngkano hungkunomne'no hwotoho hmmaso hweho. 14 Olo hungkuno Sɨtifen nalɨmasofoho. Jisas Nasaletnnta'ango sohwo Anɨtuye ango engo somo wae yonefoho. Oso yahino Mouses mta'ango inɨngkawo'nɨngkuhwoneso Jisas wae yafɨhwosi nom'ne yahino songo nejaponefoho. Oso hungkunoso Sɨtifen nelahonɨngki upa'nɨmalohwonefoho. Hwasyo ose ulɨmentohofofoho. 15 A'amukaunɨsol sohwa nohumantɨfi Sɨtifenɨmo uhwonɨmentohofoso kakoe sɨmo'mango a'amu ahwomomjo pa'nyo imo'nɨmentisofoho.